احمد موختار جاف

ئەحمەد_موختار_جاف 

دڵم پڕخوێنە جەرگم لەتلەتە بۆ لێوی گوڵنارت

نەخۆش و دەردەدارم من لە حەسرەت چاوی بیمارت

سەلیبی پەرچەمی تۆم دەس کەوێ چیمە لە ئیسلامی

کڵێسا جێگەمە جانا لە عیشقی زوڵفی زوننارت

وتی عاشق ئەبێ بەم کوشتنەت مەسروور ببی چۆنکوو

لەناو عوششاقدا تەنھا ئەتۆی قوربانی دڵدارت

شکا بازاری شەھد و شەککەر و شیرینیی قەنناد

لە ڕۆژێکۆ کە بیستوویانە خەڵقی نوتق و گوفتارت

ئەبێ کاغەز لە بەرگی گوڵ قەڵەم جانا لە عەنبەر بێ

کە من مەیلم ھەیە ئێستا بنووسم وەسفی ڕوخسارت

کە تۆ سەروی منی بێچارە قومریی دڵ حەزینی تۆم

ھەمیشە بولبولئاسا وام لە دەوری باغ و گوڵزارت

نیگار ئەمڕۆ لەناو جەمعی ڕەقیبا پێی وتم [ئەحمەد]

مەحاڵە تۆ ئیتر دەستت کەوێ یاری دڵئازارت